SI AAD CAAN U NOQOTID QOF CAAN AH CAAY!

SI  AAD CAAN U NOQOTID QOF CAAN AH CAAY!

Waa qaacido lacanadan oo baal marsan sharciga ALLE iyo dhaqanka suuban ee  Soomaalida.

Waa dhaqan laga soo minguuriyay dad ay akhlaaqdu ka carawday misna aan haysan caqli kaafiya. Waa marin habaabin qar iska tuurnimo ku salaysan. Waa hab-dhaqan bolol ah oo loo ekeysiiayay  xadaarad iyo hormar la gaaray.

Insaanka waa u dabci inuu jeclaado buunbunistiisa iyo sheeg- sheegidda samahiisa, laakiin, waxaa shay cusub ah oo waliba in lala ashqaraaro mudan, in dad waaweyn ay har iyo habeen waqti, maskax iyo maal ku bixiyaan sidii ay bulshada isaga gadi lahaayeen jeer ayna dadka iyo dalkaba kusoo kordhin hal shay oo wanaag ah.

Qofka waa u gunnimo, waa u cayb iyo sharaf darro inuu waqti ku bixiyo caannimo gacan ku rimis ah kalkii uu naftiisa wax tari lahaa oo umadda shay anfaca isku mashquulin lahaa.

Caan waad noqon kartaa adigoo qofna caayin, adigoon ceebihiisa faafin, adigoon sharaftiisa ku xad-gudbin,……,

Casrigaan la joogo oo ay ummaduhu u tartamayaa sidii ay u hormari lahaayeen kaaba-yaashooda dhaqaale,kor ugu qaadi lahaayeen  aqoontooda culuumta kala duwan, oo ay u hormari lahaayeen awoodooda iyo cududdooda ciidan, una heli lahaayeen maskax faaruq ah oo ay gumeystaan, in aan annagu-na dhex muquurano bad-weyn khiyaali ah oo aan laga bixin, waxay ku tuseysaa heerka aan kala joogno  annaga iyo hormar.  waxay daliil cad u tahay in ay nagu badan yihiin shar wadayaal cadaw ah oo aan u diir naxay naftooda iyo ta guud ee ummadda. Waxaa wax iska cad ah, in kuwa xumaan fallida caadeystay ay leeyihiin awoodo ay ku fuliyaan rabitaanadooda carunka ah.

Dadka kuwooda samaha jecel, wanaaga raba inuu sii ahaado mid jira, diinta iyo akhlaaqda wanaagsan in la isku xukumo jecel waa kuwa aan lahayn awooddii ay ku dhawaaqi lahaayeen. Dadkaas aad bay uga dharagsan yihiin in fallidda wanaaga lagu kasbado liibaan iyo hormar adduun iyo mid aakhiraba, halka kuwa dibjirka ah ay ka dharagsan yihiin in xumaanta ay falkinayaan aysan xasanaad ku helayn haddana ay ku dhiiranayaan sameynta xumaan kasta. Waa laba koox aan isku war hayn kuna  kala socda laba tog oo aad u kala durugsan.

w/Q; maxamed cabdi jeyte

sixitaanka : CabdicCasiis Shidane.